Ikalawang Pamamaalam

Pag-ibig ng aking kamusmusan
Naaalala ka, hindi makalimutan
Maraming taon man ang lumipas
Damdamin sayo’y ‘di kumukupas

Una pa lang kitang makita
Alam kong mahal na kita
Ngunit panaho’y di ayon sa atin
Kaya damdamin ko’y kinimkim

Ako’y lumuha, saksi ang Monumento
Minamasdan kita doon sa may MCU
Lihim na pag-ibig, pinakatago ko
Nagpanggap na puso ko’y bato

Isang salita mo lang ay babalik sana ako
Ngunit walang namutawi sa labi mo
Masakit man sa akin na ika’y lisanin
Walang magagawa kung di ka para sa akin

Doon ako nagtago sa Naga
Umiyak sa mahal na Pe├▒afrancia
Dalangin ay mawala sakit at dusa
Kasalanan ba ang mahalin ka?

Maraming taon ang lumipas
Puso ko’y pinagtibay, pinalakas
Sabi ko, hindi na ako gaya ng dati
Walang sino man sa aki’y maka-aapi

Hinanap kita ng walang takot
Akala, puso ko’y di mo na masasakop
Ngunit isang sulyap lang sa iyong imahe
Gaya ng dati, lutang na naman ako sa ere

Windang na animo’y batang muli
Hindi mapakali, kinakausap ang sarili
Natatakot sa mga mangyayari
Dapat ba akong magsisi?

Ang hanapin ka’y tama ba?
Ang nakaraan ba’y dapat na lang kalimutan?

Muling nagbalik ang kirot sa aking puso
Dahil mula noon, hanggang ngayon
Sa nagdaang dalawampu at isang taon
Ikaw pa rin ang mahal

Gaya ng dati, sa isip na lang kita mamahalin
Ngunit isang salita mo lamang
Pagdurugtungin ko ang mga lupa
Upang muli’y mayakap ka

Ngunit hindi ko maiwasang itanong

Bakit ika’y hinanap pa, hindi ko alam
Iyon ba’y upang muling mag-paalam?

Saang mundo ba maaaring maging tayo?
Sabihin mo at pupunta ako.
Pupunta ako ng walang pag-aalinlangan
Kahit ako’y muli pang masaktan

Paulit-ulit kitang mamahalin
Sa puso at isip mananatili ka sa akin
Noon, ngayon at bukas
Damdamin sayo’y hindi magwawakas

- Donna Davila Maddox 9/17/2020